Monthly Archives: January 2013


Maa

                            

This is for my first love, my granny… who is the biggest reason behind what I am and how I am… More for my granny here at Granny’s day out

Maa kab itnee boodhi ho gayee pataa hee nahee chalaa…
pataa hi nahi chala ki kab chahare ki khaal ne jhurriyon kaa daaman thaam liyaa aur maa ke chahare par kaee nadiyon ki dhaaraao ki tarahaa phail gayien…
Maa ne kai baar mujhe kahaa vaapas ghar aane ke liye… Delhi me rahane ke liye…
mujhe kabhi pataa hi nahi chalaa ki wo mujhe hameshaa apane paas rakhanaa chahatee thi…
hameshaa chahti thi ki jab bhi unhe apne daato kaa kaam karaanaa ho, to mai unake saath rahoo…
jab bhi unhe koi jodo ke dard ki takleef ho, to mai unake x-ray karaaun…
aaj bhi maa ki photo dekhataa hoon to unkee aankho me wahi sawaal… “Daato ke daakktar ke chale…?”
unaki lagabhag sabhi tasveero me unake nakli daant zarur dikhate hain… jaise unhe dikhaa ke vo mujhe hasaane ki koshish kar rahi ho…
hansi aa bhi jaati hai bahut baar… topic hi hot thaa, unke daant…

Maa ne kabhi bhi hame pareshaan hone kaa mauka nahi diyaa…
ham maukaa dhoondhate bhi the to vo us mauke ko dandaa maar ke bhagaa deti thi…
bahut koshish karte the ham kabhi-kabhi apani maa ko haai profile Maa banaane ka…
jaise aaj-kal seerials me haai profile maayien hoti hain, dependent types…
jin kaa bahut dhyaan rakhaa jaataa hai, jinke bolne se pehle hi unhe har cheez laake de di jaati hai,
jin ke liye ghar ke andar hi sabhi sukh-suvidhaao kaa implementation kiyaa jaataa hai…
par vo meri Maa thi, kathor, independent…


Ek dam apane balboote par jine wali… binaa kisi dipendencies ke… binaa kisi ki help ke…

jab tak jaan gale me naa atak jaaye, tab tak sab khud karanaa, binaa kisi ki madad liye hue…
jo aurat heart-attack ke tisare din hi fir se kaam karane lage, use aap kahaa tak sahara dene ki baat sochoge…

ek cheez jo mujhe bahut achchhe se yaad hai aur shaayad zehen mein itni basi hui hai ki nikalna bhi chaahoo to nahi nikalegi…
aur vo hai mere bachpan me maa ko kaam karate hue dekhane ki dhundhali tasveerein…
maa jab bhais kaa dudh nikalati thi to mujhe aawaaz lagaa leti thi…
aur fir baalti se pehle doodh ki dhaar seedhaa mere muh me…
itanaa taazaa dudh ki aaj 25 saal baad bhee usakaa swaad mere muh me basaa huaa hai…
fir vo maa kaa raai se doodh bilonaa…
vo haree ki aanch me doodh garam karna…
vo sookhi lakadiyo ke chhote chhote dher ikatthaa karate rehna chulhe ki aanch ke liye…
vo Chakki pees kar aataa nikaalanaa…


Maa ke transformation ki bhi gawahi de sakti hain meri yadein…

Jaise vo haath ki chakki electric chakki mein badal jana aur Maa ka fir vo chalana sikhna…
Maa ne proper knowledge transfer (KT) liyaa tha electric chakki kaa…
Fir vo manual haath wali raai se electric raai par aana…
Fir vo Maa ka Paidal chalne se lekar meri car mein baithne tak kaa safar…

Kai baar bohot si baton ka bohot baad mein ehsaas hota hai…
Jaise aaj mujhe lagta hai ki main Maa ko apni car mein baitha ke kahin bhi le jaa sakta tha…
Kitne bhi lambe trip pe…
Aur aisa isiliye nhi ki mere bachpaan mein Maa mujhe apne kandhe par baitha kar 10-12 kilometer doctor ke dikhane le jati thi…
Balki isiliye ki ab jab sochta hoon un dino ko jab Maa meri car mein baithi thi aur main chalata tha, tab ek sukhad ehsaas se maan bhar jata hai…


Maa ki ek aadat mujhe jo sabse pasand thi…

Vo kabhi bhi aage nahi baithi thi car mein… Hamesha piche…
Aur mujhe bhi tabhi unka driver banke car chalane mein bada maza aata tha…
Ab koi ehsaas hi nahi hota, koi car mein aage baithe yaa piche…


Mere bohot se dost jante the Maa ko…

Bohot baar rukte the mere ghar…
shayad har baar jab bhi hum kisi trip se wapas aate the, to sabhi mere ghar hi rukte the aur fir wahin se office nikal jate the…
Aur jab bhi aisa hota tha, mujhe bohot daant padti thi…
Isiliye nahi ki doston ko ghar kyun leke aaya, balki isiliye ki subha-subha unhe bina khilaye pilaye hi bhaga le gaya office…
Maa ko sabse bura lagta tha jab koi ghar se bina chai piye yaa khana khaye chala jata tha…
Mujhe hamesha daant padti thi isi baat par ki office thoda late bhi ja sakte the, par sabko nashta to kara deta..


Par ek vidambana ho gayi…

Jo bhi mere dost sabse zyada mere yahan rukte the, maine Maa ke bare mein sabko bataya… unke jaane ki khabar…
Sahanubhuti paane ke liye nahi, balke isiliye ki mujhe laga ki jo log Maa se mile yaa unhe jante the, unhe maloom hona shayad zaruri hai…
Par ab 2012 aa chuka tha, log 2008 aur 2009 se zyada busy ho chuke the…


Kisi ka phone bhi nahi aaya ye janne ke liye ki kya hua aur kaise hua…

Milne ki umeed zyada karni bhi nhi chahiye aajkaal, samay badal raha hai, log zyada bhagdad mein hain, competition badh gaya hai, paisa and post zyada chahiye…


Shayad aajkal “milne” ka matlab bhi badal gaya hai… “Milne” ka matlab ab sirf aise Dhaabe reh gaye hain, jinke side mein sharab ki dukaan ho…

Ab usi cheez ko milna kehte hain doston ka…
Aur ye upar ki panktiyaan bhi meri kisi dil ke kone mein dabi hui vo bemani icchayein ho sakti hain, jo kabhi-kabhi khali dimaag mein shaitaan ki tarha ghar kar jati hain… log to sabhi acche hote hain, koi bura nahi hota… bure humare vichaar hote hain jinke kaaran hum logon ko bhi bura bana dete hain…


In sab cheezon ke bavajood, sab acchaiyon aur buraiyon ke chalte, bas Maa nahi hai beech mein…

Aaj bhi ghar mein humne unka chulha sambhal ke rakha hai…
Bohot baajre ki roti khilayi Maa ne uss pe bana ke…


Jis din Maa gayi, us din bhi lunch mein maine unke haath ki bani hui baajre ki roti khayi thee…

Agar thoda sa bhi ehsaas hota unke jane ka, to 1 roti bacha ke rakh leta main shayad… unki yaad main…
Itni acchi thi Maa ki aankhon se aansu bhi nahi nikalne diye kabhi…


Aaj bhi nahi…

Shayad limit nahi hoti koi, agar aap kisi apne ke baare mein likhne lago to…
Par ek jagah rukna to padta hai, fir se dobara likhne ke liye…


Some dates get so much alive in your heart, that they just can’t go away, no matter how many days, months and years pass by!! 18th Jan… still alive in me, my heart…

God Bless her soul!!!

RIP Maa!!!